पुणे : अजिंक्य डी. वाय. पाटील युनिव्हर्सिटीने (एडीवायपीयू) हेल्मेट वापरासाठी सहकार्य करायचा निर्णय घेतला असून, संस्थेतील विद्यार्थी, कर्मचारी व शिक्षकांना हेल्मेटचा वापर बंधनकारक करण्यात आला आहे. त्याचबरोबर ‘एडीवायपीयू हेल्मेट नियमांचे शंभर टक्के पालन करत आहे’, असा संदेश देणारा उपक्रमही संस्थेचे अध्यक्ष डॉ. अजिंक्य पाटील यांच्या पुढाकाराने सुरू करण्यात आला आहे.
या उपक्रमाबाबत बोलताना डॉ. अजिंक्य पाटील म्हणाले, ‘आमच्या विद्यार्थ्यांना उद्याचे सुजाण नागरिक बनविणे हा आमच्या विद्यापीठाचा एक भाग आहे. सर्वांना सामाजिक जाणीव असणे गरजेचे आहे आणि म्हणूनच ध्वनी प्रदूषण आणि रस्ता सुरक्षा हे दोन विषय सध्या आम्ही अग्रस्थानी ठेवले आहेत.’
रस्ता सुरक्षेचे महत्त्व अधोरेखित करण्यासाठी अजिंक्य डी. वाय. पाटील युनिव्हर्सिटीने वाहतूक पोलीस उपायुक्त तेजस्वी सातपुते यांच्याबरोबर एका विशेष संवादात्मक कार्यक्रमाचे आयोजन केले होते. या वेळी विद्यार्थ्यांनी रस्ता सुरक्षेबाबत एक सादरीकरण केले.
रस्ता सुरक्षा आणि ध्वनी प्रदूषण कमी करण्याबाबत घेतलेल्या पुढाकाराबाबत सातपुते यांनी अजिंक्य डी. वाय. पाटील युनिव्हर्सिटीचे कौतुक केले. रस्ता सुरक्षेबाबत एज्युकेशन, इंजिनीअरींग आणि एन्फोर्समेंट या तीन ‘इ’चे महत्त्व त्यांनी सर्वांना सांगितले; तसेच विद्यार्थ्यांना हेल्मेटचा वापर करण्यासाठी आणि रहदारीचे नियम पाळण्यासाठी प्रोत्साहन दिले.